حوار مع الصبر:::محمد عامر زويدات:::

نشدنی الصبر یصویحب
صدگ طعم الصبر حالی
وصدگ دمع الصبر شمعه
یروی اللیل وتلالی
وصدگ یصویحب سنین الصبر
تتروه من فکر العمر
والعمر عند الناس
سعر السوم بیه غالی
وظل منی الصبر ینشد
وانه المفجوع منه
وبگه ایــٌرک أبحیله دلالی
وطفح بالغیض گلبی وصرخ بسک
یا صبر لا تلعب ابحالی
انه ما اشکی من وجعات گلبی
المالهن تالی
لچنی اشکی طبع ربعی
اللی تجرع العلگم کاس
واتگول اشکثر حالی
عجب منهم شغل بالی
عجب ماسمعو المهره ابسلفنه
اتصیح طاح وراح خیالی
ولا شافوا مضیف احمود
من چانتله رنه وچان صیوانه شکثر عالی
ولا دلــة حمد من چانت
تنادم فناجین المضیف ابنغم موالی
عمت عین اللی ما تبصر وکتها
وما تعرف الولی من الوالی
انچفت دلة حمد واتبدت الغیره
ومضیف احمود سد بابه وصبح خالی
وصبح شمل النشامه الچان
یلتم ابمضیف احمود متشتت بالف دیرة
وبگت دلة حمد مچفیة
یم موگد مضیف احمود
والگمگم مجیر ایرید لاکن محد ایجیره
وطفه نور السلف والتهب وجه اللیل
من نامت نواطیره
وگضه نحب الشهامه ابصدر أهلنه
وذبلت الغیره
وأبو أرویشد صبح دگـاگ
من شاف السلف خلصت شواجیره
وغزتنه الغفله والوان الوسن
کحٌلت عین الناس
وأتباهه الوسن من شاف تأثیره
وکسر بینه العزیمه
وذبح صحوتنه ابمناشیره
وشرب کل مای عین الزلم هرش النوم
واتنومس ابتخدیره
وغفت عین النشامه وما صحت للیوم
کلمن ختل بسریره
وبطیف الچذب کلنه تدثرنه
وفگدنه ارواح تعبیره
وبگت تنشد ضمایرنه
عله اشما چان واشچنه
ولگت عدنه الجواب أمچتف أبحیره
أبهای النوب أمن من غضبنه ونام الأستعمار
ومن گدر علینه صاب تفکیره
من باع الدلال أعلی ابوخشاله افلان
وخله أبدالها اتدخن بوافیره
منا تأکل ابعظم الزلم ریمازت التریاگ
ومناک العدو هدهن
عله اعروگ النخل تأکل خنازیره
المصیبه أهنا
ایراوی للضیوف أعگال جده افلان
وبل منگاش یأشر علی تصویره
ویگلهم هاذ جدی واهو کل مصباح
بالمنقله یحرگ مجد جده ویطفی تنویره
عدمن نشتکی ویاهو الیشکینه
وأهی حتی المنابر نکرت السیره