لذة الگنطـٌار للشاعر طاهر السلامي - المحمرة

أحس ماضي أهلنه ابحاضر الحییٌن
مستقبل اجیال اتعیش بذلاله
العاصف ماخذاها ولا کنسها الریح
جبل شامخ تلوذ الخلگ بفعاله
هلي گمرة لیالي السود
جدح حافر شگرهم بیهایتلاله
هلي یا حید منهم لو یطب الکون
یضل یتلمٌض أعله الموت عساله
هلي سنبل خضر ما یبساه الصیف
ولا طاح ابرحه وطحنته الگاله
هلي رمز الچفافي وبشت بدري اشیوخ
او فوگ من الچفافي العگل میاله
هلي سادت زلمها وساست المخلوگ
اولواها احسین یوم المعرکه شاله
هلي یشهد لهم تاریخ
بي تفخر هله وتتنومس ارجاله
هلي یاهو المثلهم لو عطت یمناه
تظل تسبگ عطاها ابجودها اشماله
هلي بالکرم حاتم ما لواه العوز
یشرک ضیف بیته ابلگمة اعیاله
هلي ضلعین بیها الکرخه وکارون
رزق طر الارض بجنوبه وشماله
هلي بیهم الکسٌر جدم یسره الضیم
یتچه أعله رمحه وما شکه الحاله
هلي تمثال أباها اعله المجرة انشال
الخلگ تسجد اله منتشوف تمثاله
هلي راس الجبل چل جدم من یعلاه
وکل خیر الارض من زود شلاله
هلي لو صار عزها أعله الشمس یاناس
بخیوط الشمس کلها اتشلباله
هلي سورة علمهم بلعت الجهٌال
وصار العلم فوگ اخدودهم خاله
هلي فنهم نبع صافي وشعرهم شیٌم الشیمه
لوٌن شد ابوزن رباط مواله
هلي ابغیرة شرفهم صانو الناموس
وگصٌوا راس من راد ایتدنٌاله
هلي غزٌر ملح جیرانهم بالعین
ولا بیهم ابیوم الجارته من إلحسٌن تحلاله
هلي اربات النحیل ولذ ٌت الگنطار
هلي المگوار الها وشچت الفاله
وهلي کلشي هلي چانت
علی احلوگ التفگ تمشي
او هلي منها الیطیحه الموت
بس ما طیٌح اعگاله