من طرف :::الأجلح البصراوي:::

نخوه الكل عراقي ايحب العراق ....!!

*************************
*************************



بعد بينه طراوه وخضره هالروح
وبعد بينه دمع يجرح بلعيون

**
صح صعبه السنين أوصعبه الأيام
بس كلشي ابمحبتك صدّكَ ايهون

**
ما نلكَله حبيب ايداوي الجروح
ولا جفّك مثل جف اليداوون

**
اتحملنه وكتنه أو صرنه ناطور
نحرسك بلسهر عن لا يبوكَون

**
وصدكَ باكَوك لمن غمضت العين
لجن وسفه التحرسك نامت اشلون

**
خذوك ابزودهم والتمو أعليك
وكَامو من لحم جتفك ينهشون

**
تصيح الله واكبر .. صاحو وياك
بسم الله وعلى نحرك يهومون

**
بسجاجين الطمع بين الزراديم
كَامو بيك كل ساعه يحدّون

**
نواعيرك بجت والنهر عطشان
على حالك دمه ضلو ينوحون

**
وطفالك يتامى ابغيرك اليوم
من ادموعهم كَامو يرضعون

**
كِيعانك غدت تترجى للغيث
بس الغيث شح ويه اليشحّون

**
كل دمعه تسيل اتروي الخدود
تنشف كَبل لا تنبع بلجفون

**
شبابك ضيعوه أو مثلوا بيه
ويشيب أمن الحزن ما بين السجون

**
بينه الهجر شخصك وارتحل شال
وبينه البلغرب وي دهره مرهون

**
وبينه هنا اويلي اشلون يا حال
بكل شارع مدينه اهنا يموتون

**
ششكيلك بعد من ضيم الأيام
الصوره اتوضحت للي يفهمون

**
بغدادك تنوح وذبلت العين
وذيج البصره صاحت لا تنامون

**
وذي قارك تهلهل حيهم اهنا
تفرع الراس وتحزم اليفزعون

**
أعماره وقادسيه وياهن الكوت
هبّن هبّه وحده وهزّن الكون

**
ومناك الرمادي اتشد بلحزام
وجوامعه تنادي الكل يكَومون

**
وشوف ديالى لمن هزت الويد
وسفحها وي الجبال ايصير طاعون

**
وتشهد كل نجفنا ويشهد البيت
وأميرك علي شاهد عل يشهدون

**
وأخذ من كربله من طفها تربان
شم ريحة زلمها البلكرب عون

**
ومن واحة حسين اسمع تغاريد
ومن جف الجفيل الليله يروون

**
كَوم انهض بعد شيفيدك النوم
وصير الطود وابلع يلا فرعون

**
اناشد كل عراقي او هذا موال
سطرته عليكم وانتوا تدرون

**
لجن حب العراق ابين القلوب
ما اريدن الحبه اليوم تنسون

****
**
*
ما اريدن الحبه اليوم تنسون

***********
******
****
***
**
*
*
مع فائق التحيات

اخيكم

الأجلح البصراوي