الشاعر عبدالحسن فاخر الكعبي (ياعراق)

مو امسودن سودنك

انت اعقل منهم انت

وعن سلامة عقلك الراجح شفتهم راودوك ..

وانت اشرف منهم انت

وهمه يلابس العفة اشترهو ابين الخلك من جردوك

وانت صاحي ومو مريض ومن مرضهم ما عدوك

وانت الله اللي هداك وابد مو همه الهدوك

مو مسودن سودنوك ...

ياوطن يابو العطايا

يابو خير المشايح وكت الكحط وتصيح ماكو

مو فقير انت وتجدي اصخام وجه الفرهوك

ياوطن يحسين بالطف عالترايب وسدوك

من اجتك خيل امية

خيلهم داست عليك ومنك وبيك النشامى اللي اكصدوك

وما اجاك الحر ايكلك تايب اني

وياك اخذني وخلني ارد الهددوك

ياوطن يل ردت اتخلص من شرور الكيدوك

وين حجي الكالوا احنا ... وين وعد الواعدوك ؟

ياوطن يل ردت تخلص من شرور الكيدوك

اشسوة بيك الجاي من خلف البحار ؟؟

راد يبنيك احلى راية

وهو رجال العصر باسم التقدم بربدوك ...

يا تقدم بالسجاجين وخناجر تالي اهلك مرعدوك

التقدم مو حواسم مو جرايم مو نخلي اذنوب لردود المظالم

التقدم مو حرايك مو دكايك مو شريف البلعراق يصير بايك

التقدم مو خرايب مو مصايب مو شلية وتايها ومحد يحاسب

مو مسودن سودنوك

انت واحد ما تشرذمت بزمانك ...

وانت تدري شلون باوراق وخرايط حددوك

وانت واحد ...

بس منابرهم جثيرة وعلمنابر عددوك

ياوطن عقلهم انته ولا تصد العاندوك

ياوطن داويهم انت ....

ولاتعابي الشافو اجروحك غميجة وجبنوا ما ضمدوك

ياوطن بردهم انت ...

وصفي الكلوب الخبطهه فلان وفلان بخباثة

وبوس هذا وبوس ذاك

وصالح المغتاظ بعد وكله خوتك واددوك ...

مو مسودن سودنوك

ياوطن لمنه انتشاطر وانته تدري شلون لولاك نطشر

يالعزيز انضيع والله

ونغسل اصحون ابعواصم ما تحبنه

وتدري اهلهه ابوكت خيرك عالنعيم البيك حساد احسدوك

وبوكت ضيجك تبرو بالجذب ما عضدوك

يالعزيز انضيع والله

وابقضيتنه يتفلسف يضل ياهو الجان وسفة

وخايف يجيبون طاريك بسوء

الامس باجمل عبادات المدايح مجدوك

مو مسودن سودنوك ...

انت ابونه ,,,

ابحضرتك شيعي ويه سني عربي ويه كردي تركماني ومسيحي

صابئي وشبك ويزيدي الكل اجوك ...

ياعراق الكل اجوك

ياعراق الكل على الوحدة التعزك عاهدوك ...

كوموا نتلكة العراق

واكف يجوجى العراق ... ولا وكف هيبة العراق

ولا تدنك ياعراق

مو هضيمة انمد ايدنه الحضرتك يا هلعراق

احنه اهلك ساعدوك ’ احنا اهلك ساندوك

اليجي ويانة عراقي ’’

واليظل يبقى ويه غيرك ’’’ مو على الحبلين يلعب

يطلع اعليك ايتبكبك

بس سجاجينه اعلى صدرك

يرضي بيهه البنوابيب عمدوك

ينكتب تاريخ باجر ياعراق ...

يبذكر اسم اللي راد يبيع اسم بالمزاد

وينذكر اسم الرجال الخلدوك ...