شعر جميل جدا ( سمعت جاي النفط )) ؟؟

ماخذ البرميل الازرك
سمعت جاي النفط

وروحي من الفرحه طارت
بعد هيهات وتحط

غبشه امشي وكلي واهس
حيوي وجدا نشط

وحلمت بالنفط اوكع
وانخبط وياه خبط !

وحلمت علتنكر اوكف
خمس ساعات انربط !

عدلت شعري وكذلتي
وشايل بجيبي المشط

وكلت كون اوصل هناك
الساعه بالسبعه ضبط

ومن وصلت هناك
ردت انجن وعقلي ينشخط !

اليشوف السره يجفل
واقوه هبطه ينهبط

الزلم كلمن جكاره
بغضب يشهكهه وسخط

والنساوين التصرخ :
يله جا وين النفط ؟!

الناس من حركتهه عركت
والبرد يسمط سمط !

هناك لن كبت العيطه
وصفت بس (( شك شك )) (( ططط )) !!

جنهه جبهه مو محطه
والطلق كله خرط !

انبطح اركض وليوف
يله وك لا تنخمط !

رجعت ضايج اصفن
ريحة احزاني تعط

وامي لاكتني تصيح :
ها ولك وين النفط ؟

كلت هم زين الشمس
تشتعل من دون النفط !!



اخوكمــــــــ

رياض الوادي